နဲကဲ စဵုဒၞာဓဝိၚ်ကမၠောန်

ကမၠောန်ကဵု ဓဝိၚ်ဂှ် ကၠုၚ်မွဲတောဲဓဝ်ရ၊ ကမၠောန်နွံမ္ဂး ဓဝိၚ်နွံရ။ ဟိုတ်ဂှ်ကီုလေဝ် ဓဝိၚ်အောန်၊ ဓဝိၚ်ဂၠိုၚ်ဂှ် တန်တဴကဵု မၞိဟ်ဒုၚ်စသိုၚ်ရ ယဝ်ရ ဓဝိၚ်ဂၠိုၚ်မ္ဂး ဟွံခိုဟ်ကဵု ခန္ဓဇကုပိုဲတုဲ ခန္ဓပိုဲဂှ် ဍိုန်လျအာရ။ အဃောဂှ် က္တဵုဒှ်တိုန် ယဲစိုတ်စှေ် မာန်ဒၟံၚ်ရ။

နဲကဲ ပိုယ်ဂှ်ယှအ်ဖျေံ ဓဝိၚ်စံၚ်တူဒၟံၚ် ပ္ဍဲဂၠံၚ်သြိုဟ်ပိုဲ ပရောကမၠောန်ဂှ် နွံတဴဒၟံၚ် (၇) သာ် ဗွဲမလောဲသွာ သမ္တီလဝ်ဂွံရ

၁) ဒုၚ်ပါ်ပဲါ

          ပိုဲမၞိဟ်ပုထုဇန်မ္ဂးဂှ် ဟွံဍိုက်ပေၚ်ဒၟံၚ် ဖအိုတ်ပုဟ် ဟိုတ်နူဂှ်ရ အခိၚ်အခါ ညးတၞဟ်ပါ်ပဲါဇကုမ္ဂး ဂွံဒုၚ်တဲမာန်ဂှ် လွီပရာညိ။ လ္ပကလေၚ်ပတဝ်စၞး နကဵုစိုတ် အလဵုဇကုထေဲဍုဟ်ညိ ယဝ်ရ ဇကုဟွံတီမ္ဂး ဟီုဟွံတီညိ။ လ္ပပၠောပ်သ္ပ ဇကုတီညိ။ ဠဂှ်တှေ် ဟွံဒးကၠောန် ဟွံဒးစွံ စိုတ်ဓဝိၚ်ကွေံရ၊ ဇကုကၠောန်မာန်မှ ဇကုဟီုမ္ဂး ဓဝိၚ်ဂှ် သက်သာကၠုၚ်မာန်ရ။

၂) လ္ပပြိုၚ်ပ္ကာန်ဒၟံၚ်ကဵု ညးတၞဟ်သအာၚ်

          မၞိဟ်ဗွဲမဂၠိုၚ် မိက်ဂွံပြိုၚ်ပ္ကာန်ကဵု ညးတၞဟ်သအာၚ်ရ။ ဍေံလောဲ မုပ အဲဂွံဝါတ်၊ ဍေံကၠောန်ညိဓဝ် ဍေံဂွံဂၠိုၚ်နူအဲ နာနာသာ်တံဂှ် တုပ်ညံၚ်ရဴ ဖျေံဒၟံၚ်စိုတ်ဓါတ်ဇကုကီုရ။ ဇကုလေဝ်ဟွံကၠောန်မာန်၊ ညးတၞဟ်ကၠောန်လေဝ် ဇကု ရံၚ်ဗဵုဟွံဂွံတှေ် မံၚ်သၟးသၟး နာဲဖအိုတ်ဒၟံၚ် စိုတ်ဓါတ်ဇြဟတ်ဇကုရလေဝ်။ ဓဝ်ဍာံမ္ဂးဂှ် ယဝ်ရ ဇကုကၠောန်ဍာံတှေ် ဒၞာဲသွက်ဇကုဂှ် နွံဒၟံၚ်တွဵုဂှ် စှေ်ကေတ်စိုတ်ညိ။ ဟိုတ်ဒးကူချပ်မံၚ်ပရောညးတၞဟ် ကူချပ်ပရောဇကု ညံၚ်ဂွံတဴတက်၊ ဖျေံတိုၚ်ပ္ကဴ မု ဇကုမိက်ဂွံဒှ်တှေ် ဒှ်ကၠုၚ်မာန်ဖအိုတ်ရဏောၚ်။

၃) ဆက်ဆောံကဵု ညးတၞဟ်

          ဆက်ဆောံဟီုဂှ် ညံၚ်ပိုဲဂွံကၠိုဟ်ဍကဵု ညးမွဲမွဲရ။ ကသပ်တုပ်ကီု လညာတ်ဟွံတုပ်ကီုလေဝ် ကသပ်တၟိ လညာတ်တၟိဏံဂှ် ဂွံလောဲသွာကွေံရ။ ယဝ်ရ ဇကုချပ်မွဲမွဲသာ် မိက်ဂွံဒှ်မ္ဂး ချပ်ကဵု ညးမနွံကဵုပညာတံ မၞိဟ်ဇမၞော်တံတှေ် ခိုဟ်သြန်တၟာဟလိုၚ်ရ။ ဗၠေတ်မှာရာလေဝ်အောန် ၊ ဓဝိၚ်စံၚ်တူတံလေဝ် ဖအောန်ဖျေံမာန် တၟာဟလိုၚ်ရ။ ပ္ဍဲကမၠောန်ပၠန်လေဝ် အာတ်ကသပ် ရဲကၠောန်ကမၠောန်မွဲစွံလေဝ် ဂွံမာန်မံၚ်ရ။

၄) ချူဖျေံတၚ်စၟတ်သမ္တီ

          ပိုဲမၞိဟ်တံဝွံ မဝိုတ်ဂၠိုက်စလောဲသွာကွေံရ။ ချပ်ဂွံတၚ်မွဲမွဲသာ် မိက်ဂွံကၠောန်ကီု တၚ်နၚ်ဇကုမိက်ဂွံကၠောန်ဂှ် နွံဂၠိုၚ်မံၚ်မ္ဂး ချူဖျေံလ္တူလိက်တၞး ဟွံသေၚ် လိက်အုပ် ဂွံစၟတ်သမ္တီလဝ် ထေက်ရ။ ဠဂှ်တှေ် မုဇကုမိက်ဂွံကၠောန်ဂှ် ဗဵုပ္ဍဲလိက်တုဲ ကၠောန်အာတှေ် တုဲလောဲသွာရောၚ်။ အခါလ္ၚဵုဝွံ ကမၠောန်ဒးကၠောန်ဂှ် ဂၠိုၚ်မံၚ်တုဲ မုဂွံကၠောန်ကၠာဂှ် ချပ်ဟွံဒးရ အခိၚ်ဂှ်မ္ဂး ချူဖျေံမွဲတုဲမွဲ ရုဲကမၠောန်ဇကုဒးဖတုဲပြဟ်ဂှ်မ္ဂး ဓဝိၚ်ကမၠောန်ဟွံတုဲဂှ် အောန်ကၠေံအာမာန်မံၚ်ရ။

၅) ချဳဒရာၚ်ပရေၚ်ထတ်ယုက်

          ဗီုဂွံဖအောန်ထောံ ဓဝိၚ်ကမၠောန်၊ ဓဝိၚ်နာနာသာ်ဝွံ ချဳဒရာၚ်ပရေၚ်ထတ်ယုက်တှေ် ခိုဟ်အိုတ်ရ။ မုဒှ်ရောဟီုတှေ် ချဳဒရာၚ်ဍာ်ထတ်ကာယပိုဲမ္ဂး ခန္ဓဇကုပိုဲ ပ္တိုတ်ဇြဟတ်ဂၠိုၚ်တုဲ စလေဝ်စှေ်၊ တိက်လေဝ်သၠိၚ်၊ မၞိဟ်ဇကုပိုဲ မံၚ်စခိုဟ်တိုန်ရ။ ဠဂှ်တှေ် ဓဝိၚ်ကမၠောန် ပိုဲကၠောန်ဟွံမာန် ထေၚ်ကေတ်တံဂှ် အောန်တိုန်တုဲ ဇကုကၠောန်မာန်၊ ဖတုဲကမၠောန်မာန်ရ။

၆) ဂြိုၚ်ကဵုဂၠိုၚ်ညိ

          ဂြိုၚ်ဂၠိုၚ် အာယုက်ဂၠိၚ် အရေဝ်မန် ဟီုလဝ် နွံဒၟံၚ်ရ။ အ္စာသိပ္ပံတံ သ္ပလဝ် သုတေသန ပွမဂြိုၚ်ဏံဂှ် ဂဥုဲခိုဟ်ခိုဟ် မွဲကီုရဏောၚ် ဂးလဝ်ရ။ ယဝ်ရ အခိၚ်ဓဝိၚ်ဂၠိုၚ်၊ ဍောၚ်ၜိုတ်ဒၟံၚ်စိုတ်မ္ဂး ဗဵုထောံ ဗီဒီယို၀်ဒးဂြိုၚ်တံမ္ဂး ဓဝိၚ်စိုတ်ဇကု ၀ိုတ်အာမွဲလစုတ်မာန်မံၚ်ရ။

၇) အပြံၚ်လှာဲ

          ကမၠောန်ဇကုကၠောန်ဒၟံၚ်ဏံဂှ် ယဝ်ရ ဓဝိၚ်ဂၠိုၚ်ဂၠေၚ်၊ ဟွံမိက်စိုတ်၊ ဒုၚ်အေၚ်ဟွံမာန်ရမ္ဂး ပြံၚ်လှာဲထောံ ကမၠောန် ပြဟ်ပြဟ်ညိ၊ လ္ပဖအိုတ်ဒၟံၚ်အခိၚ် ဂၠာဲကမၠောန်တၟိမွဲတုဲ ပြံၚ်အာ ဗွဲမဒးရးညိ။ ဆဂးဂှ်ကီုလေဝ် အခိၚ်တၚ်ဝါတ်ဂါတ်ဒၟံၚ် ပရေၚ်သြန် နာနာသာ်တံ က္တဵုဒှ်မံၚ်မ္ဂး အေၚ်ဒုၚ်မွဲဆိၚ်ခဏတုဲ အခိၚ်ကာလ ပြေပြံၚ်မှ ဂၠံၚ်ဍာန်တၟိဂှ် ဆက်ကွာ် အာညိ။

ကဵုဒှ်တသိုတ်စိုတ် တသိုက်ကာယ ၜါပြကာအိုတ်ညိ။

ဗွဲမအဲပြဲ

buggy

တသိုက်စိုတ် ပ္ဍဲဘဝ

ပ္ဍဲဂၠးတိပိုဲဏံဝွံ လၟိဟ်မၞိဟ် (၆၀၀) ပြကောတိကဋ် လောန်ကၠုၚ်ရ။ သွက်ဂွံဂျိုၚ်တဴ ဂွံဗပေၚ်ဗုၚ်ဇကုဂှ် ဒးဂစာန်လွဳပရာဒၟံၚ် ညးညးအဲအဲရ။ လတေံ ကမၠောန်တဵုသြောံ၊ ကၠောန်ဂူတုဲ သွက်ဗုၚ်ဂၞဴဇကု ဗပေၚ်တဴလောဲဒၟံၚ်ကီုလေဝ် လၟုဟ်ဝွံ ဍေံဟွံပြေပြံၚ်ကၠုၚ်နာနာသာ်ဂှ် ဂွံဆဵုကေတ်ရ။ ပ္ဍဲဍုၚ်ပိုဲဝွံ မၞိဟ်ကမၠောန်ဟွံမွဲ နွံမံၚ်ဗ္ဒဲါ ၃ ဂအုံ ၁ ဂအုံ ဟွံကရ။ ဓၟာနူကမၠောန်ဟွံမွဲတုဲ မၞိဟ်ဒှ်လီုလာ်ကၠုၚ်၊ ဗက်မိက်ဝေၚ်စသုၚ်တုဲ ကာလဟွံပြေပြံၚ်တိုန်လံမ္ဂး ဒှ်ကၠုၚ်ယဲစိုတ်ဓါတ်စှ်ေရ။

ယဲစိတ်စှ်ေ ဟီုဂှ်မုရော 

       ယဲစိုတ်စှ်ေဟီုဂှ် စိုတ်ဓါတ်စှ်ေလောန်အာတုဲ ဟွံပတှ်ေတိုန်ဇကု၊ ပွမဍောတ်ဒၟံၚ်စိုတ်တွဵု၊ စိုတ်ဓါတ်လီုဒၟံၚ်ဟေၚ် ပံက်အဓိပ္ပါယ်ဂွံရ။ ယဲစိုတ်စှ်ေဝွံ အဝဲအာယုက်ဟွံရုဲ က္တဵုဒှ်မာန်မံၚ်ရ။ ဆဂး စိုတ်ဓါတ်စှ်ေဏံဟီုဂှ် နွံဒၟံၚ် ဗီုပြၚ်ကဵုကဆံၚ်ရ။ ယဝ်ရ ကဆံၚ်စိုတ်ဓါတ်စှ်ေ ဟွံဂၠိုၚ်ဏီမ္ဂး ကၠောန်ကမၠောန်ကေၚ်ကာတံ မာန်ဒၟံၚ်ကီုလေဝ် ယဝ်ရ ဂၠိုၚ်တိုန်အာမ္ဂး ကမၠောန်လေဝ် ကၠောန်ဟွံမာန်၊ ညံၚ်ကဵု ဇြဟတ်ဟွံမွဲ ဒှ်ဒၟံၚ်ရ။ လ္ၚဵုဝွံ ကာလ ကမၠောန်ဟွံပြေပြံၚ် စိုတ်ဓါတ်စှ်ေအာကီုလေဝ် ယဝ်ရ ကၠောန်ကမၠောန်ပြေပြံၚ်ဒၟံၚ်မ္ဂး ဍေံကလေၚ်ဒှ်ကၠုၚ် ဓမ္မတာ မာန်ဒၟံၚ်ကီုလေဝ် လ္ၚဵုဝွံ ကမၠောန်နာနာသာ် ဟွံပြေပြံၚ်၊ ကမၠောန်တေံ ဟွံစှ်ေဗီု၊ ကမၠောန်ဏံလေဝ် ဟွံစှ်ေဗီုတုဲ မၞိဟ်ဂှ် ဂွံကၠောန်မွဲမွဲသာ် ဟွံပတှ်ေတိုန် ဇကုရတုဲ အလဵုလဵု စိုတ်ဓါတ်စှ်ေဒၟံၚ်ရ။ မၞိဟ်လဆောဝ်ဝွံ နကဵုထိၚ်စိုတ်ဇကုညိလေဝ် ဟွံမာန်ရတုဲ ကြအ်အာလေဝ် နွံဒၟံၚ်ကီုရ။

ပ္ဍဲဍုၚ်အမေရိကာန်ဝွံ မၞိဟ် ၄၀ ပြကောတိကိုဋ် ဒှ်ဒၟံၚ်ယဲစိုတ်စှ်ေဂှ် တၠပညာ သ္ပသုတေသနတံ ဂွံဆဵုကေတ်ရ။ ပွိုၚ်အာယုက် ၁၀သၞာံ ဒဵုကဵု ၁၅ သၞာံဂှ် ဒှ်ဒၟံၚ်ယဲ ဂၠိုၚ်မံၚ်တုဲ အာယုက် ၁၀ သၞာံ ဒဵုကဵု ၂၄ သၞာံဂှ် ဇကုဇကု ဒက်ဂစိုတ်ကအ်တံ ဒှ်ဒၟံၚ်ရ။

မုဟိုတ်တုဲ ဒှ်ယဲဂှ်ရော

          ယဲစိုတ်ဓါတ်စှ်ေ ဂွံဒှ်ကၠုၚ်ဂှ် အဓိက ဓဝိၚ်ဂၠိုၚ်ရဟေၚ် ဟီုစဂွံရ။ မၞိဟ်ဓဝိၚ်ဂၠိုၚ်ဝွံ ဒးဂွိၚ်ဒၟံၚ်နာနာသာ်၊ ဒးဖေက်လကိုတ်မွဲမွဲဂကူတုဲ လံတိုန်မ္ဂး ယဲစိုတ်စှ်ေဂှ် စဒှ်ကၠုၚ်ရ။ မုဟိုတ်ဂွံဒှ်ကၠုၚ်ဂှ် ဗီုပြၚ် နွံဒၟံၚ်တၟာဟလိုၚ်ရ။ ဗၠာဲဝုတ်သၟူကလေၚ်တံမ္ဂး အဃောဇကုဆာန်ဒၟံၚ် ဒးဒုၚ်ပြးသာဲညးသ္ကအ်မ္ဂး စဟွံစှ်ေ၊ တိက်ဟွံသၠိၚ်၊ ဓဝိၚ်စံၚ်တူ ပေၚ်ဒၟံၚ်ဇကုတုဲ ယဲစိုတ်စှ်ေဂှ်ဒှ်ကၠုၚ်မာန်ရ။ လ္ၚဵုဂှ် ကျပေဲါသၟာန်သွဟ်လိက်၊ ဒးပ္တိတ်ထောံနူကမၠောန်၊ ကာဇီု၊ ဓါတ်ဗကပ် ဒှ်(accident)၊ ပိုန်ဒြပ်လေၚ်လာ်၊ ကမၠောန်ဟွံပြေပြံၚ်နာနာသာ်တံ ဂှ် မဆေၚ်စပ်ဒၟံၚ်ကဵု ယဲစိုတ်ဓါတ်စှ်ေ သီုဖအိုတ်ရ။

တၚ်လက္ခဏမဆဵုမာန် ပ္ဍဲမၞိဟ်ဒးဒုၚ်စသိုၚ်ယဲစိုတ်စှ်ေ

          ၁။ အောန်ဒၟံၚ်စိုတ် ဗွဲလၟိုန်။

          ၂။ မဒှ်စိုတ်ဂၠေံဒၟံၚ်တုဲ ဒှ်တိုန် မွဲမွဲသာ်မ္ဂး လညာတ်တိုန်လပါ်ပရေံ

          ၃။ ဒှ်ဓဝိၚ်၊ ဂွိၚ်လောဲ။

          ၄။ ထေၚ်စဇကု မၞိဟ်ရီုဗၚ်ဟွံမွဲ

          ၅။ စစၞဟွံမှာန်တုဲ လယျိုၚ်မၞိဟ် တိုန်အာ (ဟွံသေၚ်) လယျိုၚ်မၞိဟ်စှ်ေအာ

          ၆။ စိုတ်ကၠောန်မွဲမွဲသာ် ကၠေံဗဒန်အာ၊

          ၇။ ဓညိၚ်စိုတ်ဟွံဂွံ၊ ချပ်ဒၟံၚ်ပရောတေံ ပရောဏံတုဲ စိုတ်ကဵု မၞိဟ်ဂှ် ဟွံဒှ်မွဲဓဝ်။

          ၈။  တိက်ဟွံသၠိၚ်၊

          ၉။ ဇကုထေၚ်ကေတ်ဇကု ဒုဟ်နွံတွဵုတုဲ မိက်ဂွံ ဂစိုတ်ကၠေံထောံလမျီုဇကုတံဟေၚ် မဒှ်ရ။ ဇကုပါ်ပဲါ ပ္ဍဲစိုတ်ဇကုညိ နကဵုတၚ် (၉)တၚ်ဝွံ အဲဒှ်မံၚ် မွဲမွဲရဟာ၊ ယဝ်ရ ပိုဲဆဵုအာ ကိတ်ညဳဒၟံၚ်ကဵု ပိုဲ မွဲမွဲတၚ်မ္ဂး ပိုဲဒးပလေဝ်ဇကုပိုဲထေက်ရ။

အဵုမီဂါ ၃ (Omega 3) 

ယဲစိုတ်စှ်ေဝွံ မဆေၚ်စပ်ဒၟံၚ်ကဵု (နှလုံးသွေးကြော)ကောန်တၟံပိုဲရ။ အဵုမီဂါ(၃)ဝွံ ဍေံမခိုဟ်တဴကဵု ယဲစိုတ်စှ်ေကု ကောန်တၟံပိုဲဂှ် တၠပညာသုတေသနအ္စာသဝ်တံ ဂွံဆဵုကေတ်ရ။ ယဝ်ရ ပိုဲစစၞစ အဵုမီဂါ(၃)ပါဒၟံၚ်မ္ဂး ယဲစိုတ်ဓါတ်စှ်ေဂှ် မအောန်စှ်ေကၠုၚ်ရ။ ဟိုတ်ဒှ်သာ်ဂှ်ရ အ္စာသဝ်ဝဳယဲစိုတ်တံဂှ် စစၞစ အဵုမီဂါ(၃)ပါဂှ် ညိဟေၚ် မဆဝ်မ္ၚုဟ်ဂှ် မၞိဟ်ယဲတံဂှ်ရ။ နူကဵု ဘာတက္ကသိုလ်ဟားဗာတ် အ္စာသဝ်ဝဳယဲစိုတ် Dr.stoll ချူလဝ်လိက်မွဲအုပ်ဂှ်ဝွံ သုၚ်စောဲ အဵုမီဂါ(၃)တုဲ ဝီယဲစိုတ်စှ်ေဂှ်မ္ဂး ဂွံအံၚ်ဇၞးကၠုၚ်ဂှ် ချူလဝ်နကဵု သက်သဳရ။ ဆ္ဂး သုၚ်စောဲ အဵုမီဂါ(၃)ဟေၚ် ယဲစိုတ်စှ်ေ ဒးကၠေံဗဒန်တွဵုဂှ် ဟီုဟွံဂွံရ။ ယဲဂွံသာစှ်ေအာဟေၚ် ဒှ်အထံက်အပၚ်ရ။

စစၞဗွဲမဒးရးညိ

          နကဵု ဗွဲမလောဲသွာ တက်နဲဒ္ဂေတ် ဒးမံၚ်ထေက်ဂှ် စစၞဗွဲမဒးရးညိ။ ဓါတ် အဵုမီဂါ(၃) မပါဒၟံၚ် စၞစတံဂှ် စကဵုဂၠိုၚ်ညိ၊ ဥပမာ - ကဆော်လမွန်၊ မၜဲ၊ သတ်ချး တံဂှ် စကဵုညိ။ ဓါတ်ကာဗီုဟိုက်ဒရိုက် မပါဂၠိုၚ် မပ္တံ စၞဍာတ်ဍာတ်တံဂှ် လ္ပစညိ။ စစၞဍာတ်ဍာတ်ဂၠိုၚ် ယဲစိုတ်စှ်ေ ပဵုဂၠိုၚ်တိုန်ဂှ် တရဴဏံ ဂွံဆဵုကေတ်တုဲ ယဝ်ရပဲါမာန်မ္ဂး လ္ပစညိ။

ချဳဒရာၚ် ပရေၚ်ထတ်ယုက်

          ချဳဒရာၚ် ပရေၚ်ထတ်ယုက်ဝွံ ခိုဟ်နာနာသာ်ရ။ သွက်ရဲဒှ်ယဲစိုတ်စှ်ေတံဂှ်လေဝ် ယဝ်ရ ကၠောန်ဒၟံၚ်ပရေၚ်ထတ်ယုက်မ္ဂး မဝိုတ်ကၠေံမံၚ် ဓဝိၚ်ကီု၊ ဇကု လေပ်အာ ကွတ်မွဲမွဲသာ်တုဲ ဇကုပတှ်ေတိုန်ဇကုတုဲ စိုတ်ဓါတ်ကလေၚ်တိုန်ကၠုၚ်မာန်ဟွံက မၞိဟ်လေဝ် မံၚ်စထတ်ယုက်တဴကီုရ။ ဆ္ဂး ဒးကၠောန် ရိုဟ်တ္ၚဲ အခိၚ်ကဵုမှာန်ညိ။ မၞိဟ်ဂှ်လေဝ် ဍောၚ်ၜိုတ်တုဲ ကူချပ်ပရောတေံ ပရောဏံဟွံမာန်တုဲ တိက်သၠိၚ်လောဲသွာရ။ လံမ္ဂး ယဲတိက်ဟွံသၠိၚ်လေဝ် ကၠေံအာမာန်ရ။

ထိၚ်စိုတ်ဇကုညိ        

နကဵု စိုတ်ဇကု ကူချပ်ဒၟံၚ် ပရောပရေံပရေံတံဂှ် ဂွံကၠေံအာဂှ် ဒးထိၚ်စိုတ်ဇကုရ။ နကဵု ဗုဒ္စဘာသာပိုဲတံဝွံ လုပ်ဂဇံဓဝ်၊ ဖ္ဍောတ်ဂါထာတုဲ ဓညိၚ်စိုတ်ဂွံဒၟံၚ်ရ။ ပ္ဍဲကဵု အခိၚ်ကသီု ဗြဲဂူတိုန်မ္ဂး ညးပံက် ဒၞာဲဂဇံဓဝ်မ္ဂး လုပ်ဂဇံဓဝ်တုဲ ကလၚ်ကဵုညိ။ နကဵု အ္စာတၠတံ ထ္ၜးကဵုဂှ် ဗက်ကၠောန်တုဲ နကဵု ဓဝိၚ်စိုတ်တံ ကၠေံအာမာန်မံၚ်ရ။ ယဝ်ရ အခိၚ်စိုတ်ယှုက်တိုန်မ္ဂး ဒၞာဲၜိုဟ်ၜိုဟ်သြိုဟ်သြိုဟ် ရုဲမံၚ်ညိ။ ဝေၚ်ယောဂ၊ ဝေၚ်ထိုက်ကျိ၊  ပ္တီ ယီုလုပ်ယီုတိတ်တံ ယဝ်ရ ဍန်ဂြက်တိုန်မ္ဂး ရဲဇကုပတှ်ေစဂွံဂှ် ပံက်သြိုဟ်တုဲ လဴထ္ၜး ကေတ်ကသပ်မ္ဂး နကဵု ဇကု မဒုၚ်စသိုၚ်ဒၟံၚ် စိုတ်မလ္ၚုလ္ၚန်ဂှ်လေဝ် သာစှ်ေအာ မာန်တၟာဟလိုၚ်ရ။

ဝီကဵု ဂဥုဲ

          ယဝ်ရ ဇကုဟွံပတှ်ေစ ဇကုဗီုလီုဂွံပရောမ္ဂးတှ်ေ အာကဵု အ္စာသဝ်တုဲ အာတ်ကသပ်ညးတံ မုဂဥုဲဒးသုၚ်၊ ဗီုလဵုဂွံမံၚ်တံဂှ် ထေက်ရ။ ယဝ်ရ ညးကဵု ဂဥုဲတုဲ သုၚ်ဒၟံၚ်မ္ဂး ညးဟွံတီ လ္ပထပိုတ်ထောံ ဂဥုဲသုၚ်ဒၟံၚ်ညိ နကဵု အလဵုဇကု အာရာန်ကေတ်ဂဥုဲကေတ်ကေတ်တုဲလေဝ် သုၚ်ဟွံထေက်ရ။ ဓမ္မတာဂဥုဲယဲစိုတ်စှ်ေဝွံ ဖျုၚ်တုဲ မွဲဂိတု၊ ၜါဂိတုဟေၚ် နကဵုအသိၚ်ဂဥုဲတံ ဂွံထ္ၜတိုန်မာန်ရ။ သာစှ်ေမ္ဂး ယှအ်ပမာဏဂဥုဲတုဲ ယဝ်ရ ဗၠးအာမ္ဂး ဂွံဗဒေံါထောံဂဥုဲရ။ ဟိုတ်ဒှ်သာ်ဂှ်ရ အာကဵုအ္စာဂဥုဲဟေၚ် ဗွဲမဂပ်ဂဝ်ဒးရးရောၚ်။ အိုတ်ကၞောတ် စိုတ်ဇကု ဇကုထိၚ်မာန်၊ ပရေၚ်ထတ်ယုက်လေဝ် ခိုဟ်တိုန်မ္ဂး ဘဝဟီုဂှ် ဒှ်ကၠုၚ်တသိုက် အရေၚ်ဇကုဟေၚ်ရ။

(source : internet)

ကဵုဒှ်တသိုက်စိုတ် တသိုက်ကာယညိအဴ

ဗွဲမအဲပြဲ

buggy

ဗီုပြၚ်ကၠောန် ဗၠံက် ခန်လ္ရတ် (၄)

                                                ခန်လ္ရတ် (၄)

စိုပ်ကၠုၚ်ကဆံၚ်ဏံတုဲ ဗၠံက်ပိုဲဂှ် ပိုဲစချူလိက်ပရေၚ်ဂွံရ။ ကၠာပိုဲဟွံဂွံချူဏီဂှ် ပိုဲပံက် (Gmail account)ပိုဲတုဲ ကလၚ်အာ (Blogger)ဂှ်မ္ဂး ဂွံဆဵုကေတ် ဗီုသၟဝ်ဏံ ဝွံရ။

ယဝ်ရ ပိုဲဍဵု (Start Blogging)မ္ဂး ဒၞာဲပိုဲဂွံ စချူလိက်ပရေၚ်ဂှ် မံက်ကၠုၚ်ရ။ 

(Compose) ဟီုဂှ် ဗီုဂွံချူလိက်ပရေၚ် ဓမ္မတာရ။ ယဝ်ရ ပိုဲပြံၚ် (HTML)တှေ် ဂွံကီုလေဝ်၊ (HTML) ဂှ် သွက်အရၚ် ကၠိုဟ်ပရော (HTML )တှေ် သုၚ်စောဲပဵုခိုဟ်ရ။ နကဵုအဲမ္ဂး အဲချူလိက်ပရေၚ် ပ္ဍဲ (microsoft word) တုဲမှ အဲစၠောံစုတ် ပ္ဍဲဗၠံက်မဒှ်ရ။ ဠဂှ်တှေ် ဂွံပြဟ်ညိ ထေၚ်ကေတ်ရ။

(Post Title) ဂှ် မုက်က္ဍိုပ်လိက်ဇကုမဒှ်ရ။ မု ပရောဇကု ချူရော ရုဲစှ်က္ဍိုပ်လိက်ကျေဝ်ကျေဝ်ညိ။

(Publish) ဂှ် ယဝ်ရ ချူတုဲမ္ဂး သွက်ဂွံ ပ္တိုန်လိက်ပရေၚ်ဇကု လ္တူဗၠံက်မဒှ်ရ။ ဆဂှ်ရ ကၠာဟွံဂွံပ္တိုန်လိက်ပရေၚ်ဏီမ္ဂး ဍဵု (Preview)တုဲ ဗဵုစံၚ်ရံၚ်ကၠာညိ၊ မအက္ခရ် စှေ်မံၚ်ဗီုဟာ၊ ဍောတ်မံၚ်ဟာ၊ ဇၞော်မံၚ်ဟာ၊ ဗီုကဵု မလိက်ဂှ် ကြပ်မံၚ်ဟာ နာနာသာ်ဂှ် ရံၚ်တုဲမှ ပ္တိုန်ညိ။ ဠဂှ်တှေ် ဗၠေတ်မှာ အောန်ညိရ။

(Label) ဟီုဂှ် ယဝ်ရ ပိုဲချူလိက်ပရေၚ်တံ၊ ကဗျတံ၊ ဒွက်တံ၊ ဗီုတံ နာနာသာ်မ္ဂး ပါ်ထောံ ကဏ္ဍမွဲကဵုမွဲတှေ် ဒးသုၚ်စောဲရောၚ်၊

ကှေ် ပိုဲစချူစံၚ်ရံၚ် လိက်ပရေၚ်ဂွံရ။ ဒၞာဲဏံဝွံ ဂွံထ္ၜးဥပမာဂှ် အဲသုၚ်စောဲလိက်ပရေၚ် ချူဗၠံက်မဒှ်ရ။ ယဝ်ရ ချူတုဲမ္ဂး ပိုဲဍဵု (Publish) ရောၚ်။ 

ယဝ်ရ ဍဵု (Publish) တုဲမှ မိက်ဂွံ ထပ်ပဠေဝ်မ္ဂး ဒးထပ်ဍဵု (Update) ရောၚ်၊ စွံသတိညိ။ အခိၚ်ပိုဲချူပ္တိုန်လိက်ပရေၚ်တုဲမ္ဂး ဍေံဓမံက်ထ္ၜး ဗီုရုပ်သၟဝ်ဏံပၠန်ရ၊

လိက်ပရေၚ်ပိုဲဂှ် ပိုဲပ္တိုန်လဝ်တုဲယျ၊ ဍေံဒှ်ဒၟံၚ်အလဵုရောဂှ် ဍဵု (View Blog) တုဲ အာဗဵုဂွံရ။ ဆဂှ်ရ ဟိုတ်နူကဵု ဟွံသ္ပချိတ်လဝ်ကဵု မအက္ခရ်မန်ယူနီကုတ် ဇကုမသုၚ်စောဲဂှ်တုဲ မအက္ခရ်ဂမၠိုၚ်ဝွံ ဒှ်ဒၟံၚ်ဗီုသၟဝ်ဏံရ။ ဗှ်လေဝ် ဟွံဂွံရ။

သွက်ဂွံဗှ်ဂွံဂှ် ပိုဲဒးချိတ် မအက္ခရ် မန်ယူနီကုတ် လ္တူလပှ်ကျာတှေ် ကၠာရ။ ဗီုဂွံချိတ်မအက္ခရ်ဝွံ ဟွံဒးစာတ်ကွေံကွေံရ။ ယဝ်ရ မိက်ဂွံ ဗှ် ဗီုဗၟာဝွံ အာ ဒၞာံဏံညိ။

ဗွဲကိုပ်ကၠာ ဍဵု (Template) ဂှ်ညိ။ ဆက်တုဲ ဍဵု (Customize) ဗီုသၟဝ်ဂှ်ညိ

ဆက်တုဲပၠန် ဍဵု (Advance) ဂှ်ညိ၊ နူကဵု (Advance) ဂှ် အာ (Add CSS) ညိ။ တုဲမ္ဂး

@font-face {
font-family:'MON3 Anonta 1';
src:local('MON3 Anonta 1'),url('http://mmwebfonts.comquas.com/fonts/mon3.ttf');
}
body,html,p,code,*,table,td,tr,span,div,a,ul,li,input,textarea{font-family:'MON3 Anonta 1'!important;}

အတိုၚ်လိက်လ္တူဏံဂှ် စုတ်ပ္ဍဲ အတိုၚ်ဗီုသၟဝ်ဂှ်ညိ၊ လိက်ဗှ်ဟွံဂွံဂှ် ပြံၚ်လှာဲအာတုဲ ဗှ်ဂွံတိုန်ရ၊ ဆဂး ပိုဲလ္ပဝိုတ်စ ဒးဍဵု (Apply to Blog)ဂှ်ညိ။ ယဝ်ရ ပိုဲဝိုတ်အာမ္ဂး ဍေံဗှ်ဟွံဂွံပၠန်ရ၊  

ဟိုတ်ဂှ်ရ (Apply to Blog) ဂှ် ဍဵုတုဲတှေ် ပိုဲအာဗဵု ဗၠံက်မ္ဂး ဍေံမံက်တိုန် အတိုၚ်မအက္ခရ်ဖအိုတ်ရ။ 

ယဝ်ရ ဟွံဂွံဗှ် ခန်လ္ရတ် (၁) ဏီမ္ဂး အာဒၞာဲဏံညိ။

ကဵုဒှ်တသိုက်စိုတ် တသိုက်ကာယညိအဴ

ဗွဲမအဲပြဲ

buggy

ဗီုပြၚ်ကၠောန် ဗၠံက် ခန်လ္ရတ် (၃)

                                                 ခန်လ္ရတ် (၃)

ယဝ်ရ စကၠောန်ဗၠံက်ဏောၚ်ဟီုတှေ် (Gmail account) နွံမွဲ တှေ်ရုမ်ဂပ်ရ။ ဗွဲကိုပ်ကၠာ ပံက် (Gmail Account) ဇကုတုဲ ရုဲကေတ် ဗီုသၟဝ်ဏံညိ။

ဒၞာဲစုတ်လဝ်အရံၚ်ဂှ် ဍဵုတှေ် မံက်ကၠုၚ်ဗီုသၟဝ်ဏံပၠန်ရ။ 

ဆက်တုဲ ဗပေၚ်စုတ် မပ္ဍုက်ဇကုတုဲ မံက်ကၠုၚ် ဗီုသၟဝ်ဏံပၠန်ရ။

ယဝ် ရ ရုဲစှ် ဗီုစုတ်လဝ်အရံၚ်မ္ဂးတှေ် ပရောဇကု ဆမိက်ဂွံလဴဂှ်ရ မံက်မံၚ်ရ၊ ယဝ်ရ ရုဲကေတ် (Google+ )မ္ဂး မံၚ်အတိုန်ဗီု (Gmail Account) ဇကုရ။ ဒးစိုတ်ဂှ် ရုဲစှ်ကေတ်ညိ။

ယဝ်ရ ဗပေၚ်ယၟုဇကုတုဲ တက်စုတ်ဏာမ္ဂး ဒၞာဲပိုဲ ဂွံစကၠောန်ဗၠံက်ဂှ် စိုပ်ကၠုၚ်ရ။ ဗဵု ဗီုသၟဝ်ဏံညိ

 

ဠဂှ်တှေ် ပိုဲဍဵုစုတ် ဒၞာဲစုတ်အရံၚ်မ္ဂး ဂွံဆဵုဗီုဏံပၠန်ရ။

( Title ) ဂှ် ပရောဗၠံက်ဇကုမဒှ်ရ။ ဗၠံက်ဏံဂှ် ချူလဝ် ပရော ဗီုပြၚ်ကၠောန်ဗၠံက်မဒှ်ရ။

(Address )ဂှ် ယၟုဗၠံက်ဇကုမဒှ်ရ၊ ယၟုလ္ရဵုလ္ၚဵုဂှ်  ဍေံဟွံဒုၚ်တဲမ္ဂး  ဍေံဟွံထ္ၜး မံက်တဝ်ပုဟ်။ ဒဵုကဵုဂွံ မံက်တဝ်ဂှ် ပဠေဝ်ယၟုဗၠံက်ဇကုညိ။

(Template) ဟီုဂှ် ဒီဇြာၚ် ဗၠံက်ဇကုမဒှ်ရ၊ ဟိုတ်ဂှ်ရ ဗီုဒးစိုတ်မွဲဂှ် ရုဲကေတ်တုဲ ဍဵု (Create Blog)ညိ။

မံက်တိုန် ဗီုသၟဝ်ဏံပၠန်ရ 

ကှေ် လၟုဟ်ဂှ် ဍဵု (view blog) ဂှ်ညိ။ ဗၠံက်ဇကုဂှ် မံက်တိုန် ဂတမတ်ဇကုရအဴ။ ဆဂး မုလိက်ပရေၚ် နာနာသာ်လေဝ် ဟွံဂွံချူဏီတုဲ ဒှ်ဒၟံၚ် ဗီုသၟးရ နွံဒၟံၚ်ရ။ 

    

ယဝ်ရ ဟွံဂွံဗှ် ခန်လ္ရတ် (၁) ဏီမ္ဂး အာဒၞာဲဏံညိ။

ကဵုဒှ်တသိုက်စိုတ် တသိုက်ကာယညိအဴ

ဗွဲမအဲပြဲ

buggy

ဗီုပြၚ်ကၠောန် ဗၠံက် ခန်လ္ရတ် (၂)

                               ခန်လ္ရတ်  (၂)

          ရဲချူဗၠံက်မန်၊ မုက်လိက်မန်တံ သုၚ်စောဲဒၟံၚ် မအက္ခရ်မန် (၃) ဗီုဂှ် ရဲတံ ဂွံဆဵုကေတ်မာန်ရ။ ဆဂှ်ကီုလေဝ် ပ္ဍဲလိက် ဗီုပြၚ်ကၠောန်ဗၠံက်ဏံဝွံ အဲမိက်လဴထ္ၜးဏာကဵု ဗီုဂွံသုၚ်စောဲ မန်ယူနီကုတ် မဒှ်ရ။ မုဟိုတ်ရော ဟီုတှေ် မန်ယူနီကုတ်ဂှ် သုၚ်စောဲမလောဲသွာကီု၊ သွက်အရၚ်အနာဂတ်ပိုဲအာဂတဂှ် မအက္ခရ် ကဆံၚ်ယူနီကုတ်မှ ပိုဲကၠောန်ဂွံနာနာသာ်ကီု၊ မအက္ခရ်ပ္ဍဲမုက်လိက်ဗၠံက်ဇကု သွက်အရၚ်ဗှ်လိက်တံ ဗှ်ညာတ်ဟအိုတ်ကီုတုဲ အဲရုဲစှ်လဝ် မအက္ခရ်ဏံရ။ ခန်လ္ရတ် (၄)တှေ် ဗီုလဵုဂွံစုတ် မအက္ခရ်မန်ဂှ် ထ္ၜးကဵုဏောၚ်။

ဗီုဂွံသုၚ်စောဲ ယဝ်ရ ဟွံကၠးမ္ဂး ဂြဲဖျေံတုဲ ဗှ်စံမ်ရံၚ်လိက် ချိုတ်ချိုတ်ပၠိုတ်ပၠိုတ်ညိ။

https://www.dropbox.com/s/2dh2rx0tuxmqr98/Mon3%20Unicode.rar

ကှေ် ပိုဲစချူဗၠံက်ဏောၚ်ဟီုတှေ်  ပိုဲဒးဖအိုတ်သၠုဲဟာ? ၊ သၠုဲဟွံဒးအိုတ် ဒၞာဲကၠောန်ဗၠံက်သၟးသၟးနွံဒၟံၚ် တၟာဟလိုၚ်ရ။ သၟဝ်ဏံဂှ် ဗၠံက်မန်ဗၟာပိုဲတံ မကၠောန်ဂၠိုၚ်ဂှ် ထ္ၜးလဝ်ကဵုပၠန်ရ။ မုဟိုတ်ရော ဟီုတှေ် ဂွံဂွံသ္ဇိုၚ်ပေၚ်ပေၚ်ဟေၚ် စှေ်လဝ်စိုတ်တုဲ ဒၞာဲဒးတီထေက်ဂှ် စုတ်လဝ်ကီုရ။ ယဝ်ရတီမံၚ်ရတှေ် ဗှ်ထၜက်ထောံဂွံမံၚ်ရ။

Blogger: Create your free Blog

www.blogger.com/ 

ညးမကၠောန်ဗၠံက်ဗွဲမဂၠိုၚ် သုၚ်စောဲဂၠိုၚ်အိုတ်ဂှ် ဗၠံက်ကာ (blogger)ရ နူကဵု (Google ) ပ္တိုန်လဝ်တုဲ ကဵုသၟးသၟးပေၚ်ပေၚ်ရ။ နဲကဲဗီုပြၚ်ကၠောန်ဗၠံက်လေဝ် အဲသောၚ်ထ္ၜးကဵု သုၚ်စောဲဗၠံက်ကာဏံရ။

WordPress.com - Get a Free Blog Here

wordpress.com/

wordpress ဏံလေဝ် ညးမသုၚ်စောဲဂၠိုၚ်မံၚ်ကီုရ။ ရဲမိက်ဂွံချူဗၠံက်ခိုဟ်ခိုဟ်ညိတှေ် သုၚ်စောဲ wordpress တုဲ ကၠောန်ညိ။ ဍေံလေဝ် ဟွံဒးအိုတ်သၠုဲကီုရ။

Weebly - Create a free website and a free blog

www.weebly.com/

weebly လေဝ် မန်ပိုဲကၠောန်လဝ်နွံဒၟံၚ်ကီုရ၊ ကၠောန်ဟွံဝါတ်ကွေံကွေံရ။ ဍေံလေဝ် ဟွံဒးအိုတ်သၠုဲကီုရ။

Blog.com — What's your story?

blog.com/

မုက်လိက်ဏံ တၞဟ်ဟွံခြာကဵု weebly ပုဟ်၊ လ္ရတ်စမ်ညိ ကၠောန်ဂွံရ။

ဗၠံက်ကဵုလဝ် ဗီုဗီုဏံ ဟွံဒးအိုတ်သၠုဲဂှ် နွံဒၟံၚ်တၟာဟလိုၚ်ကီုလေဝ် ထ္ၜးလဝ် ဥပမာညိညရအဴ။ ရဲမိက်ဂွံကၠောန်ဗၠံက်ဂှ်လေဝ် မုက်လိက်အလဵု ဇကုမိက်ဂွံကၠောန်ဂှ် ရုဲစှ်တုဲ ကၠောန်အိုတ်ညိ။

ဗီုပြၚ်ကၠောန်ဗၠံက်ဏံဝွံ သုၚ်စောဲဏာ ဗၠံက်ကာ www.blogger.com/  တုဲ ချူဏာဏောၚ်။

 

ယဝ်ရ ဟွံဂွံဗှ် ခန်လ္ရတ် (၁) ဏီမ္ဂး အာဒၞာဲဏံညိ။

ကဵုဒှ်တသိုက်စိုတ် တသိုက်ကာယညိအဴ

ဗွဲမအဲပြဲ

buggy